Sandrone a ruota libera, il testo dello Sproloquio 2019

Sandrone: Dòunca in dov’ér’i-a armes? A sé….. Come al solit, prémma ed gnir chè in piàza, a-i-ho fat un gir per Mòdna per vàder s’a gh’éra del nuvitè dato che, da soquant més, i giornè i scréven che la nostra zitè l’é adré ch’l-a cambia.. Mè a-v dév dir che di gran cambiameint a-n n’ho ménga vést. Piàza Mateoti l’è sèimper qualla, Piaza Mazzini i l’han sbusida ma a-n s’è ancàrra capî come e quand i la finiran….. E al problema dal parcàg’, per chi vol gnir in cèinter, i-n l’han ancàrra risolt. Scólta Sgurghéghel, vést t’è adré a studièr da geometra, l’avrésset tè ‘na soluzion per psér parcheggèr in cèinter sèinza andèr satt tèra?

Sgorghiguelo: Sicura ch’a gh l’ho. Mè a turév cal bloch ed cemeint coi bus ch’i han fàt in d’a gh’éra la ferriéra, lè da la Maserati, ed fianch a le torri gemelle e, visto che nisùn a-l le dróva, a-l mitrév pèra,pèra in Piàza Mateoti: avremmo così un moderno parcheggio sopraelevato per la gioia di turésta e di Mudnés.

Sandrone: Bravo! E al problema ed l’inquinameint in cèinter in d’a-l màttet ?.

Sgorghiguelo: Al matt insàm a chi èter problema: ai fómm ed- l’inceneridor, a quàl degl’avtomobil, alle polveri sottili e l’anidride carbonica…… s’andàm avanti acsè anch a Mòdna a-s tucarà màttres el mascarèini come i fan in Cina.

Sandrone: Oh,veh !! Stare calmi ! Csa cherdìv che i problemi i- s risolven cun del ciàcher ? Tachè mo’ vuèter żóven a fèr meno fómm col zigaràtt e a butèr el cécchi in di post adibiti all’uopo.

Sgorghiguelo: A pèrt che l’uopo mè a-n sò gnanch in d’a-l sia, a dégh ch’l’è ora che in ceinter i-gh màtten di baslòt bê grand ch’i-s vàdden s-i vólen che la geint l’a-n bótta el cécchi per tèra…

Pulonia: Mè, invece, a degh che prémma ed tótt a-gh vól dl’educazioun e biságna rispetèr l’ambiente s’a vlàm che la nostra zitê la sia pulida.

Sandrone: È-t gh’è ragioun e se l’asesór a l’ambiente al vól tgnir pulida Mòdna, a-gh cunsélli d’andèr a fèr un gir al zimitéri ed San Cateld che, a causa di clamb, in tèra a gh’è ‘na spana ed pulèina…… 

Pulonia: L’è véra!!!! L’è ‘na mancanza ed rispèt,dato ch’a-l duvrév éser un luogo sacro…..

Sgorghiguelo: Ma se ai clamb i-gh mitéssen i mudànd, a n n’avréven bèle risolt al problema?

Sandrone: Mudnés, avî da savér che quand a Mòdna a sàm sàtta elezioun, i-m dìsen tótt ch’a-m dév candidèr a séndech . A-n ve nascand che ‘na quelch volta a g’ho pensè ma gi-m vuèter: cuma póssia fèr la campagna elettorèl s’a-n sun brisa boun ed cuntèr del bàl? Cuma fàgh’i-a a dir ai Żemiàn che la violeinza e i furt in del cà i’én calè o che la droga l’a-n gira ménga in del scól? Che el strèdi el van bèin anch coi bus e che el pésti ciclabil bisàgna fèrli anch s’a-n li dróva nissun? Che i lavor in piàza Mazini, quî ed l’ex fonderia, quî ed piàza Sant’Agustein i én a boun punt quand invece i van avanti come l’òra!!! No ! no ! Fèr al politich a-n n’è brisa al mê mestér, mè a gh’avrò i mê difètt ma a gh’ho ‘na parola sól e al prumàssi,Sandroun,a-l li mantìn!!!

Pulonia: Sé, come qualla che-t m’è fat l’an pasè quand e-t m’è imprumés che per al noster cinquantesimo ed matrimoni è-t m’avréss purtè a zèina da Bottura.

Sandrone: Mè a gh’ho pruvé Pulonia ma la segretaria ed Massimo la m‘ha détt che davanti da mè a gh’éra del prenotazioun da tótt al mand e ‘na lésta d’atésa ed sê més. 

Pulonia: Come a la Mutua per fèr ‘na visita specialistica...

Sandrone: Sé, propria acsè….Mè a g’ho spieghè ch’a vliva sól andèr a zèina e ménga fèr ‘na TAC, ma a-n gh’è stê gninta da fèr: per andèr a zèina da Bottura a-gh vól minim sê més. I fan sól ‘na quelch eccezioun per qui chi prenòten da Montecitorio o da piazza della Signoria ed Firenze .

Pulonia: Bèin mè a dégh che i Mudnés i g’han d’avér la precedèinza. Veh,Massimo,dato t’è un Mudnés anca tè dà mo’ dispusizioun ai tuoi accoliti che,quand a telefona un Żémian,i-gh càten un post a séder. Mè a-n vàd l’ora d’andèregh…… Diiiio Sandroun, peinsa, cena da Bottura e a seguire una lunga notte d’amore.

Sandrone: Lunga notte d’amore? Ma s’a l’avàm fata ch’l’è pòch!!

Pulonia: Pòch…a gh’éra ancàrra la lira.

Sandrone: Arcòrdet Pulonia che Bacco tabacco e Venere riducono l’uomo in cenere.

Pulonia: Alora tè t-é pin ed salut e san come un curai: tè-n fómm brisa, é-t bàvv seimper meno, e Venere per tè …..

Sandrone: Veh Pulonia dagh mò un tai e fa bàcca da rédder come ch’egli ètri, che mè a dèv andèr avanti. Mudnés, sî-v andè a vàdder al mega-ritràtt ed Pavarot chi han fat in dla facèda dla sô Casa-Museo? Al nòster Lucianoun l’è sorridèint e al saluta tótt qui ch’i a-l van a catèr…. pensè che Muzzareli l’i-n vliva un cumpagn cun la sô ghégna atach al palaz ed la Comuna. Quand i gh’han détt che per fèrel a gh vliva sê més, l’ha decis d’aspettèr dap egl’elezioun per a-n cazèr via i sold. Ogni modo, Zemiàn, a-v dév dir che nonostante a-n sàmma ménga in di prémm post ed la graduatoria, a Mòdna a s-la passàm ancàrra abàsta bèin; l’an pasè a-s sàm schivè al taramòt, égl’inundazioun, el trambi d’aria e po’ a-n n’è brisa crullè al punt ed sant’Ambros e gnanch quàl ed Navsèl: l’unich disàster l’è ch’a sàm sèimper piò in bulatta!!!! V’i-n sî-v acort che i nòster sold in banca i càlen sèinza ch’a i spindàmma ? La colpa l’è ed chi filibustiér sèinza scrupol che in tótt al mand i fan al bèl e al brótt teimp coi sold ed chi èter.

Pulonia: A t’l’ho détt tanti volti, turnàm a màttri sàtta al tamaràzz cuma fèven ‘na volta!!!

Sgorghiguelo: Beh mò schérzet ? Con tótt i lèder laureê in “ scasso con lode “ ch’a gh’è in gir, i t’i càten subét. Piotòst, dèmi a mè ch’a dév fèr un investimeint in una start-up . A gh’ho in mèint ed brevetèr ‘na tràpla per ciapèr i pòundegh mort perché ciapèri da viv a-s fa ‘na vétta da can.

Pulonia: Diiiio !!!! Che fiol inteligeint ch’a-i-ho fat e pensèr ch’i- n l’han brisa vlû all’Unimore. Purtròpp l’è sèimper stèda acsè, a scóla Sgurghèghel l’éra fortunèe come un can in césa……..

Sandrone: Pian… Perché adèsa a-n n’è ménga piò come ‘na volta, adèsa i padroun di can i pòrten anch in césa e ménga sól per Sant’Antani. Oh!! Intindàmes bèin, mè a-n gh’ho gninta countra i can, a me dmand sól dove i la pólen fèr s-l’a gh duvéssa scapèr. Sgnor Vàschev, Lò cs’i-n dìsel ? L’è vera ch’a gh’è srà di cristian ch’i-s cunfànden col bésti……ma i can i-n n’én mai stê batzè……